(ភ្នំពេញ)៖ នាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី៨ ខែធ្ននេះ សូមចូលរួមសហការពីគ្រប់អង្គភាពដែលពាក់ព័ន្ធក្នុងការបង្ក្រាបរាល់បទល្មើសទាំងឡាយ ដើម្បីធានានូវសន្តិសុខសណ្តាប់ធ្នាប់សាធារណៈជូនប្រជាពលរដ្ឋ។

ទន្ទឹមនឹងនេះ នាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា ក៏មានបណ្តាសារព័ត៌មានមួយចំនួនបានផ្សព្វផ្សាយព័ត៌មានមិនពិត ធ្វើការសន្និដ្ឋានពីសកម្មភាពមិនល្អលើមន្ត្រីនគរបាលនៃនាយកដ្ឋានប្រឆាំងបទល្មើសបច្ចេកវិទ្យា ដែលនាំឱ្យមហាជនមានការយល់ច្រឡំ និងបាត់ទំនុកចិត្តលើកងកម្លាំងមានសមត្ថកិច្ចដែលខិតខំក្នុងការស្រាវជ្រាវបង្ក្រាបជនល្មើស។

ឆ្លៀតក្នុងឱកាសនេះ ឯកឧត្តម ឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា សូមឱ្យបណ្តាអ្នកសារព័ត៌មានមួយចំនួន ក៏ដូចជាអ្នកប្រើប្រាស់បណ្តាញសង្គមឱ្យមានការពិចារណាក្នុងការបង្ហោះ ផ្សព្វផ្សាយ ឬចែកចាយព័ត៌មានមិនពិត ដែលផ្ទុយពីច្បាប់វិជ្ជាជីវៈសារព័ត៌មាន មាត្រា៨ និងមាត្រា១១ ចៀសវាងជាហេតុបង្កឱ្យមានចលាចល អសន្តិសុខសង្គម និងអាចនឹងប្រឈមមុខចំពោះច្បាប់ផងដែរ៕