(សហរដ្ឋអាមេរិក)៖ លោក Bill Barr រដ្ឋមន្ត្រីមន្ត្រី​ក្រសួងយុត្តិធម៌អាមេរិក បានថ្លែងថា ក្រសួងយុត្តិធម៌មិនបានរកឃើញភ័ស្តុតាងណាមួយបញ្ជាក់ថាមានការលួចបន្លំសន្លឹកឆ្នោតឡើយ ដែលជាការឆ្លើយតបលើកិច្ចខិតខំប្រឹងប្រែងរបស់ប្រធានាធិបតី លោក ដូណាល់ ត្រាំ ដែលបដិសេធលទ្ធផលនៃការបោះឆ្នោតកាលពីខែមុន។ នេះបើយោងតាមការចុះផ្សាយរបស់ CNA នៅថ្ងៃទី០២ ខែធ្នូ ឆ្នាំ២០២០។

នៅក្នុងបទសម្ភាសន៍ជាមួយសារព័ត៌មាន Associated Press លោក William Barr បាននិយាយថា «មកដល់ពេលនេះយើងមិនបានឃើញការក្លែងបន្លំក្នុងកំរិតមួយដែលអាចជះឥទ្ធិពលដល់លទ្ធផលខុសគ្នានៅក្នុងការបោះឆ្នោតនោះទេ»។

លោក Bill Barr បានផ្តល់កិច្ចសម្ភាសន៍ចំពេលក្រុម យុទ្ធនាការឃោសនាបោះឆ្នោតរបស់លោក ដូណាល់ ត្រាំ នៅតែបន្តអះអាងថាការបោះឆ្នោតមានការលួចបន្លំសន្លឹកឆ្នោតនៅតាមរដ្ឋសំខាន់ៗដូចជា Georgia, Michigan និងរដ្ឋ Pennsylvania។

ជម្រាបដែរថាលោក Barr ធ្លាប់ជាសម្ព័ន្ធមិត្តរបស់ប្រធានាធិបតីនាពេលកន្លងមក ដោយលោក ត្រាំ បានទទូចថា លោកគួរតែដឹកនាំការស៊ើបអង្កេតណាមួយទៅលើការលួចបន្លំសន្លឹកឆ្នោត៕