(ភ្នំពេញ)៖ លោក សោម អូន ប្រធានសភាសម្ព័ន្ធសហជីពជាតិកម្ពុជា នាថ្ងៃទី២៨ ខែវិច្ឆិកានេះ បានដឹកនាំក្រុមការងារ NACC Team Against Covid-19 ចុះផ្សព្វផ្សាយ និងបាញ់ថ្នាំបំភាយសម្លាប់មេរោគ ការពារការឆ្លងរាលដាលជម្ងឺកូវីដ១៩ នៅនាយកដ្ឋានបច្ចេកទេស និងវិទ្យាសាស្រ្ត និងអគារលេខាធិការដ្ឋានកិច្ចការទីប្រឹក្សា និងជំនួយការនៃក្រសួងមហាផ្ទៃ។ 

នៅក្នុងពិធីប្រគល់ និងសំណេះសំណាល​នោះ លោក សោម អូន បានលើកឡើងថា ប្រជាជនកម្ពុជា មានមោទនភាព ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជាប្រមុខដឹកនាំ បានខិតខំទប់ស្កាត់នូវរាល់បញ្ហាប្រឈមនានា ដែលបានកើតឡើង ជាពិសេសនៅក្នុងដំណាក់កាលពិភពលោកកំពុងជួបនៅភាពវឹកវរ ដោយសារការឆ្លងរាលដាលជំងឺកូវីត១៩នេះ។ កិច្ចខិតខំប្រឹងប្រែង និងការចូលរួមគ្រប់មជ្ឈដ្ឋាន ធ្វើឲ្យ «កម្ពុជាជាប់ចំណាត់ថ្នាក់​លេខ៣ ក្នុងពិភពលោក ក្នុង​ចំណោម​ ១៦៦ ​ប្រទេស និងលេខ១ នៅអាស៊ី ជាប្រទេស ដែលមានស្ថានភាពគ្រប់គ្រងជម្ងឺកូវីដ-១៩ និងផល​ប៉ះពាល់ពីជំងឺបានល្អជាងគេ»។ នៅកម្ពុជា មិនមានអ្នកស្លាប់ដោយសារជំងឺកូវីដឡើយ៕