(ភ្នំពេញ)៖ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានប្រកាស ឲ្យសិស្សានុសិស្ស និងលោកគ្រូអ្នកគ្រូ ដែលពាក់ព័ន្ធករណីស្ត្រីភរិយាអគ្គនាយកពន្ធនាគារ ទៅធ្វើតេស្តឲ្យបានគ្រប់ៗគ្នា នៅមន្ទីរពេទ្យមិត្តភាពខ្មែរ-សូវៀត ឬមន្ទីរពេទ្យរុស្ស៊ី ក្នុងរាជធានីភ្នំពេញ។
ក្រសួងសុខាភិបាល បានរៀបចំទីតាំងមួយទៀត សម្រាប់ធ្វើតេស្ត ដល់សិស្សានុសិស្ស និងលោកគ្រូអ្នកគ្រូ ដែលពាក់ព័ន្ធនឹងករណីស្ត្រីភរិយាអគ្គនាយកពន្ធនាគារ ដែលរកឃើញ វិជ្ជមានវីរុសកូវីដ-១៩ ថ្មី នៅថ្ងៃទី២៨ ខែវិច្ឆិកា ឆ្នាំ២០២០។ ទីនោះ គឺនៅក្នុងបរិវេណមន្ទីរពេទ្យមិត្តភាពខ្មែរ-សូវៀត។ ដូច្នេះ សូមអញ្ជើញសិស្សានុសិស្ស និងលោកគ្រូអ្នកគ្រូ ដែលពាក់ព័ន្ធករណីខាងលើ ទៅធ្វើតេស្តឲ្យបានគ្រប់ៗគ្នា។ នេះបើតាមការបញ្ជាក់របស់លោកជំទាវ ឱ វណ្ណឌីន។
ក្រសួងសុខាភិបាល បានរៀបចំកន្លែងធ្វើតេស្ត យកវត្ថុសំណាករបស់អ្នកពាក់ព័ន្ធនឹងអ្នកជំងឺកូវីដ១៩ នៅក្រសួងមហាផ្ទៃ ផ្សារទំនើបអ៊ីអនទី១ និងនៅពន្ធនាគារព្រៃស ក្នុងរាជធានីភ្នំពេញ ព្រមទាំងនៅសាលាគរុកោសល្យ ខេត្តសៀមរាប ចាប់ពីម៉ោង ៧កន្លះព្រឹកថ្ងៃទី២៩វិច្ឆិកានេះ។
វិធានការបន្ទាន់របស់ក្រសួងសុខាភិបាលនេះ បានធ្វើឡើង បន្ទាប់ពីក្រុមគ្រួសាររបស់អគ្គនាយកពន្ធនាគារ សរុបចំនួន ៦នាក់ បានឆ្លងជំងឺកូវីដ១៩ ដែលបានធ្វើតេស្ត និងបង្ហាញលទ្ធផល កាលពីយប់ថ្ងៃទី២៨ ខែវិច្ឆិកា ឆ្នាំ២០២០។
ក្រសួងសុខាភិបាល បានប្រកាសថា ករណីចម្លងមេរោគកូវីដ១៩ នៅក្នុងសហគមន៍នេះ មានអ្នកពាក់ព័ន្ធផ្ទាល់ និងប្រយោល រួមទាំងថ្នាក់ដឹកនាំមួយចំនួន នៅភ្នំពេញ សៀមរាប ខេត្តស្ទឹងត្រែង ខេត្តមណ្ឌលគិរី និងខេត្តបន្ទាយមានជ័យ។
នៅថ្ងៃអាទិត្យ ទី២៩ ខែវិច្ឆិកានេះ មន្ទីរអប់រំ យុវជន និងកីឡា រាជធានីភ្នំពេញ បានចេញផ្សាយនូវបញ្ជីឈ្មោះគ្រូ ថ្នាក់ទី៥ "ក" និងថ្នាក់ទី៧ "ក" នៅសាលារៀនអន្តរទ្វីបអាមេរិកកាំង សាខាចាក់អង្រែ ដែលបានប៉ះពាល់ផ្ទាល់ជាមួយសិស្ស ២នាក់ ដែលជាកូនរបស់អគ្គនាយកពន្ធនាគារ ដែលមានវិជ្ជមានវីរុសកូវីដ១៩។ នោះគឺមានលោកគ្រូអ្នកគ្រូ ១១នាក់ ហើយគ្រូទាំងនោះ ក្រៅពីបង្រៀននៅសាលាឯកជន AIS ក៏ជាគ្រូបង្រៀននៅសាលារដ្ឋ រួមមាន អនុវិទ្យាល័យ ហ៊ុន សែន ជ្រៃហូព្នៅ ក្នុងខេត្តកំពង់ស្ពឺ នៅវិទ្យាល័យច្បារអំពៅ វិទ្យាល័យហ៊ុនសែន សេរីភាព ( តាខ្មៅ ) វិទ្យាល័យព្រែកលៀប អនុវិទ្យាល័យអនុវត្ត ( តាខ្មៅ ) និងនៅវិទ្យាល័យ ហ៊ុន សែន ព្រែកថ្មី ( ខេត្តកណ្តាល )៕
