(ភ្នំពេញ)៖ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ ស្ថិតក្នុងចំណោមថ្នាក់ដឹកនាំជាន់ខ្ពស់ជាច្រើនរូប ដែលបានចូលរួមប្រជុំជាមួយឯកឧត្តម ឆែម សាវុធ អគ្គនាយកពន្ធនាគារ ដែលរកឃើញឆ្លងជំងឺកូវីដ១៩ កាលពីថ្ងៃទី២៨ ខែវិច្ឆិកា។ កិច្ចប្រជុំនៅទីស្តីការក្រសួងមហាផ្ទៃ កាលពីថ្ងៃទី២៤ ខែវិច្ឆិកា ដឹកនាំដោយសម្តេចក្រឡាហោម ស ខេង ហើយថ្នាក់ដឹកនាំក្រសួងយុត្តិធម៌ ៥រូប រួមទាំងឯកឧត្តម កើត រិទ្ធ បានអញ្ជើញចូលរួមក្នុងកិច្ចប្រជុំនោះ។
ឯកឧត្តម កើត រិទ្ធ បានលើកឡើងថា «តាមការណែនាំពីក្រសួងសុខាភិបាល ខ្ញុំសូមស្នើអ្នកទាំងអស់ ដែលបានជួបជាមួយខ្ញុំ ឬជួបប្រជុំជាមួយខ្ញុំ ចាប់ពីថ្ងៃទី ២៤ ខែវិច្ឆិកាមក សូមមេត្តារក្សាខ្លួននៅក្នុងផ្ទះ និងការពារអ្នកនៅក្នុងផ្ទះផ្សេងទៀត ដើម្បីជាវិធានការប្រុងប្រយ័ត្ន និងបង្ការការឆ្លងជាយថាហេតុណាមួយ ក្នុងក្រុមគ្រួសារ និងញាតិមិត្តជិតឆ្ងាយរបស់យើង ទោះបីជាមានការពាក់ម៉ាស់ និងហានិភ័យតិចតួចក៏ដោយ»។
ឯកឧត្តម កើត រិទ្ធ បន្តថា «ខ្ញុំសូមអធ្យាស្រ័យពីសហការីទាំងអស់ ចំពោះផលរំខាននេះ។ ដោយគារវកិច្ចដ៏ស្មោះស្ម័គ្រ និងដ៏ជ្រាលជ្រៅពីខ្ញុំ! ខ្ញុំសូមបញ្ជាក់ជូនសហការីទាំងអស់ជ្រាបថា លោក សុច សុផាន់ណារ៉ា ក៏បានចូលរួមប្រជុំនៅថ្ងៃទី២៤ ខែវិច្ឆិកា និងបានថតស៊ែលហ្វីជាមួយបង ឆែម សាវុធ ដែលបច្ចុប្បន្ន រកឃើញថា មានកូវីដ-១៩។ ដូច្នេះ តាមការណែនាំពីក្រសួងសុខាភិបាល ខ្ញុំសូមស្នើអ្នកទាំងអស់ ដែលបានជួបជាមួយលោក សុច សុផាន់ណារ៉ា ចាប់ពីថ្ងៃទី២៤ ខែវិច្ឆិកាមក សូមមេត្តារក្សាខ្លួននៅក្នុងផ្ទះ និងការពារអ្នកនៅក្នុងផ្ទះផ្សេងទៀត ដើម្បីជាវិធានការប្រុងប្រយ័ត្ន និងបង្ការការឆ្លងជាយថាហេតុណាមួយ ក្នុងក្រុមគ្រួសារ និងញាតិមិត្តជិតឆ្ងាយរបស់យើង ទោះបីជាមានការពាក់ម៉ាស់ និងហានិភ័យតិចតួចក៏ដោយ»។
ឯកឧត្តម កើត រិទ្ធ បានគូសបញ្ជាក់ថា «សមាសភាពដែលបានចូលរួមប្រជុំថ្ងៃទី២៤ ខែវិច្ឆិកា អមរូបខ្ញុំ រួមមាន៖ ១-ឯឧ គឹម សន្តិភាព ២-ឯឧ ប៉ែន ពេជ្រសាលី ៣-លោក សុច សុផាន់ណារ៉ា ៤-លោក យ៉ម ផារ៉ូត។ ដូច្នេះ តាមការណែនាំពីក្រសួងសុខាភិបាល ខ្ញុំសូមស្នើអ្នកទាំងអស់ ដែលបានជួបជាមួយខ្ញុំ ឬសមាសភាព ដែលបញ្ជាក់ខាងលើ ចាប់ពីថ្ងៃទី២៤ ខែវិច្ឆិកា មក សូមមេត្តារក្សាខ្លួននៅក្នុងផ្ទះ និងការពារអ្នកនៅក្នុងផ្ទះផ្សេងទៀត ដើម្បីជាវិធានការប្រុងប្រយ័ត្ន និងបង្ការការឆ្លងជាយថាហេតុណាមួយ ក្នុងក្រុមគ្រួសារ និងញាតិមិត្តជិតឆ្ងាយរបស់យើង ទោះបីជាមានការពាក់ម៉ាស់ និងហានិភ័យតិចតួចក៏ដោយ។ ខ្ញុំសូមអធ្យាស្រ័យពីសហការីទាំងអស់ ចំពោះផលរំខាននេះ។ ដោយគារវកិច្ចដ៏ស្មោះស្ម័គ្រ និងដ៏ជ្រាលជ្រៅពីខ្ញុំ!»។
ការលើកឡើងរបស់រដ្ឋមន្ត្រីក្រសួងយុត្តិធម៌ខាងលើនេះ បានធ្វើឡើងភ្លាមៗ បន្ទាប់ពីប្រពន្ធរបស់អគ្គនាយកពន្ធនាគារ ឯកឧត្តម ឆែម សាវុធ ត្រូវបានរកឃើញឆ្លងជំងឺកូវីដ១៩ កាលពីយប់ថ្ងៃទី២៨ ខែវិច្ឆិកា។ ភ្លាមៗ ឯកឧត្តម ឆែម សាវុធ កូន និងក្រុមគ្រួសារ សរុប ៥នាក់ទៀត ត្រូវបានធ្វើតេស្ត រកឃើញឆ្លងជំងឺកូវីដ១៩។
ក្នុងនោះ ថ្នាក់ដឹកនាំច្រើននាក់ផ្សេងទៀត ដែលបានចូលរួមកិច្ចប្រជុំថ្ងៃទី២៤វិច្ឆិកា រាប់ទាំងសម្តេចក្រឡាហោម ស ខេង ក៏ត្រូវធ្វើតេស្តរកមេរោគកូវីដ១៩ និងធ្វើចត្តាឡីស័ក តាមការកំណត់របស់ក្រសួងសុខាភិបាល ផងដែរ៕
