( ខេត្តកណ្តាល )៖ ក្នុងពិធីសម្ពោធដាក់ឲ្យដំណើរការមជ្ឈមណ្ឌលកំសាន្ត «ព្រីនស៍ ម៉ាណ័រ» នៅស្រុកកៀនស្វាយ ខេត្តកណ្តាល នាព្រឹកថ្ងៃពុធ ទី០៧ ខែតុលា ឆ្នាំ២០២០ ក្រោមដំណក់ទឹកភ្លៀង សម្តេចតេជោ ហ៊ុន សែន បានប្រកាសច្រានចោលនូវការចោទប្រកាន់ថា កម្ពុជាប្រគល់កំពង់ផែយោធា នៅសមុទ្ររាម ក្នុងខេត្តព្រះសីហនុ ឲ្យចិន ប្រើប្រាស់ផ្តាច់មុខ។
សម្តេចតេជោ ហ៊ុន សែន លើកឡើងថា «ប៉ុន្មានថ្ងៃនេះ ចោទកម្ពុជាថាប្រគល់កំពង់ផែរាម ឲ្យចិនប្រើប្រាស់ផ្តាច់មុខទៅទៀត! ដែលបង្ខំចិត្ត ត្រូវចាក់ឡើងវិញនូវអ្វីដែលខ្ញុំបាននិយាយនៅខេត្តព្រះសីហនុ តាំងពីខែ៦ ចាក់ឡើងវិញឲ្យស្តាប់ បកជាភាសាអង់គ្លេសឲ្យមើលទៀត ហើយអោយក្រសួងការបរទេស ធ្វើណោទទូត ផ្ញើទៅគ្រប់ស្ថានទូត។ លោកហ៊ុនសែន និយាយអីចេះ! ម៉េចក៏ថា ចង់ធ្វើកំពង់ផែយោធារាម ឲ្យទៅជាកំពង់ផែអន្តរជាតិ? ម៉ែអាណា ធ្វើកំពង់ផែយោធា ឲ្យទៅជាកំពង់ផែអន្តរជាតិ!»។
សម្តេចតេជោ ហ៊ុន សែន បន្ថែមថា «យើងអាចឲ្យចូលនៃនាវាប្រទេសច្រើន មិនមែនកំព់ងផែអន្តរជាតិ ដូចកំពង់ផែដឹកទំនិញទេ។ យើងមានកំពង់ផែមួយ កំពង់ផែយោធា! អាណុង កំពង់ផែចំបាំង។ អីចឹងត្រូវសុំការអនុញ្ញាត។ មិនមែនគ្រាន់តែចិនមួយ មានសិទ្ធិប្រើប្រាស់ទេ។ ប្រទេសដទៃ ដែលសុំការអនុញ្ញាត មកចូលចត ចាក់ប្រេង ឬឡើងគោក ដើម្បីសមយុទ្ធជាមួយនឹងកម្ពុជា ឬក៏ធ្វើកិច្ចការអ្វីមួយ ជាមួយកម្ពុជា។ យើងស្វាគមន៍»។
ជាមួយនឹងប្រសាសន៍ខាងលើនេះ សម្តេចតេជោ ហ៊ុន សែន ក៏បានហាក់ដូចជាចំអកទៅអ្នកដែលតែងតែលើកឡើងថា កម្ពុជារណបជាមួយចិន ដោយសារតែចិនផ្តល់ជំនួយដល់កម្ពុជា ពិសេសធ្វើផ្លូវ និងស្ពានរាប់ពាន់គីឡូម៉ែត្រ។
សម្តេចតេជោ ហ៊ុន សែន បញ្ជាក់ថា «... អរគុណមិត្តចិន ដែលបានធ្វើផ្លូវកម្ពុជា រាប់ពាន់គីឡូម៉ែត្រ! អ្នកខ្លះឃើញចិន មកជួយធ្វើផ្លូវ ផ្តល់ជាជំនួយឥតសំណង ផ្តល់ជាប្រាក់កម្ចីឲ្យកម្ពុជាធ្វើផ្លូវ បែរជាថា កម្ពុជារណបចិន! ជ្រើសរើសយកចិន ចោលមហាអំណាច! មហាអំណាចនេះ មហាអំណាចនោះ! ប៉ុន្តែខ្ញុំចង់បញ្ជាក់ ខ្ញុំចង់សួរត្រឡប់ទៅវិញ បើផ្លូវហ្នឹង ស្ពានហ្នឹង ចិនមិនបានធ្វើទេ? តើនរណាមកធ្វើជួស? ខ្ញុំសូមសួរទៅវិញ? សួរថា បើចិនកុំលូកដៃ ចូលជួយ តើនរណាជួយ? ឆ្លើយមក? អោយតែអ្នកឯងឆ្លើយថា អ្នកនេះធ្វើបាន អ្នកនោះធ្វើបាន! អាចនិយាយបានថា ខ្ញុំគួរចុះចេញពីតំណែងដែរ។ ប៉ុន្តែពួកគេបានត្រឹមថា ពួកគេបានត្រឹមប្រើប្រាស់ផ្លូវហ្នឹងដែរ ប៉ុន្តែពួកគេអត់បាននិយាយដល់ទេ»៕
