(ភ្នំពេញ)៖ អង្គភាពអ្នកនាំពាក្យរាជរដ្ឋាភិបាល បានរៀបចំសន្និសីទសារព័ត៌មាន ស្តីពី «យុទ្ធសាស្ត្រកែលម្អការខូចខាត ដែលរងផលប៉ះពាល់ ដោយសារគ្រោះទឹកជំនន់ ក្នុងវិស័យអភិវឌ្ឍន៍ជនបទ» នាព្រឹកថ្ងៃទី២៤ ខែវិច្ឆិកា ឆ្នាំ២០២០ នៅទីស្តីការគណៈរដ្ឋមន្ត្រី។ ក្នុងសន្និសីទកាសែត លោក ចាន់ ដារ៉ុង អ្នកនាំពាក្យក្រសួងអភិវឌ្ឍន៍ជនបទ បានបញ្ជាក់ថា ផ្លូវរបស់ក្រសួងអភិវឌ្ឍន៍ជនបទ ដែលរងផលប៉ះពាល់ធ្ងន់ធ្ងរដោយសារជំនន់ទឹកភ្លៀងថ្មីៗនេះ ប៉ះពាល់ធ្ងន់ធ្ងរ នៅ ៩ខេត្ត រួមមាន៖ ខេត្តបន្ទាយមានជ័យ ខេត្តពោធិ៍សាត់ ខេត្តបាត់ដំបង ខេត្តកំពង់ស្ពឺ ខេត្តសៀមរាប ខេត្តប៉ៃលិន ខេត្តកណ្តាល ខេត្តកំពង់ឆ្នាំង និងខេត្តឧត្តរមានជ័យ។
តំណាងក្រសួងអភិវឌ្ឍន៍ជនបទ បន្ថែមថា ផ្លូវ ដែលរងផលប៉ះពាល់ដោយទឹកលិច សរុបទូទាំងប្រទេសចំនួន ៣៣៤ខ្សែ ដោយមានប្រវែងសរុប ២៩១០ គ.ម។ ក្នុងនោះ នៅពេលទឹកស្រកទៅវិញ ផ្លូវដែលរងការខូចខាត មានប្រវែង ១៧១០,៥០ គ.ម។ ក្នុងការស្តារឡើងវិញនូវផ្លូវខូចខាតទាំងនេះ ក្រសួងអភិវឌ្ឍន៍ជនបទ ត្រូវការថវិកាសរុបប្រមាណ ៩១លានដុល្លារអាមេរិក។
លោក ចាន់ ដារ៉ុង បន្ថែមថា មកដល់ពេលនេះ ក្រសួងអភិវឌ្ឍន៍ជនបទ ទទួលបានថវិកាពីក្រសួងសេដ្ឋកិច្ច និងហិរញ្ញវត្ថុ ចំនួន ១៥លានដុល្លារហើយ ដើម្បីស្តារឡើងវិញនូវផ្លុវខូចខាត ហើយក្រសួង ក៏មានថវិកាវិភាត ឆ្នាំ២០២០ សម្រាប់ប្រើប្រាស់លើការស្តារឡើងវិញនូវផ្លូវខូចខាតនេះ។
អ្នកនាំពាក្យ បន្តថា ក្នុងចំណោមផ្លូវខូចខាតដោយជំនន់ទឹកភ្លៀងកន្លងមកនេះ ក្រសួងកំណត់ជាអាទិភាព ដែលត្រូវជួសជុល និងស្តារផ្លូវជនបទខូចខាត មុនគេ គឺនៅ ៣ ខេត្ត រួមមាន៖ ខេត្តបន្ទាយមានជ័យ ត្រូវការថវិកា ៤,៦ លានដុល្លារ ខេត្តពោធិ៍សាត់ ៤,៦ លានដុល្លារ និងខេត្តបាត់ដំបង ចំនួន ៣,៣ លានដុល្លារ។
យ៉ាងណាក៏ដោយ មកដល់ពេលនេះ អ្នកនាំពាក្យក្រសួងអភិវឌ្ឍន៍ជនបទ លោក ចាន់ ដារ៉ុង បានបញ្ជាក់ថា ក្រសួងបានតភ្ជាប់ និងជួសជុលផ្លូវលំជនបទ ដែលខូចខាតដោយគ្រោះទឹកជំនន់ថ្មីៗនេះ បាន ១១១,៥៥ គ.ម ដើម្បីឲ្យមានប្រក្រតីភាពឡើងវិញ៕
