(ភ្នំពេញ)៖ ដូចការគ្រោងទុក នៅព្រឹកព្រលឹមថ្ងៃចន្ទ ទី១៦ ខែវិច្ឆិកា ឆ្នាំ២០២០ កម្ពុជា បានដឹកតាមយន្តហោះនូវអំណោយម៉ាស ចំនួន ២លាន ១២ម៉ឺនម៉ាស និងបរិក្ខារពេទ្យ សរុបចំនួន ១២មុខ ចាកចេញពីអាកាសយានដ្ឋានអន្តរជាតិភ្នំពេញ បញ្ជូនចេញទៅជួយមិត្តឡាវ ដើម្បីទប់ស្កាត់ការរីករាលដាលជំងឺឆ្លងកូវីដ១៩។ នៅម៉ោងជិត ១០ព្រឹកនេះ យន្តហោះពិសេសដឹកម៉ាស និងបរិក្ខារពេទ្យទាំងនេះ បានចុះចតនៅព្រលានយន្តហោះទីក្រុងវៀងចន្ទន៍ហើយ។
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំយកអំណោយទាំងនេះ ទៅកាន់ប្រទេសឡាវ តាមយន្តហោះពិសេស។
គណៈប្រតិភូកម្ពុជា ដែលធ្វើដំណើរតាមយន្តហោះពិសេស ដើម្បីយកជំនួយម៉ាស និងបរិក្ខារពេទ្យ ជូនរដ្ឋាភិបាល និងប្រជាជនឡាវ រួមមាន ៥រូប គឺសម្តេច ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីការពារជាតិ លោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល ឯកឧត្តម សុខ សំអាង ឯកឧត្តម ជា វណ្ណា ជំនួយការសម្តេចពិជ័យសេនា ទៀ បាញ់ និងលោក សុង វិនតាក់ ប្រធាននាយកដ្ឋានទំនាក់ទំនងអន្តរជាតិ របស់ក្រសួងសុខាភិបាល៕
