(ភ្នំពេញ)៖ ក្រសួងធនធានទឹក និងឧតុនិយម បានប្រកាសនៅព្រឹកថ្ងៃសៅរ៍ ទី០៧ ខែវិច្ឆិកា ឆ្នាំ២០២០ ក្រុមការងារបច្ចេកទេសនាយកដ្ឋានវិស្វកម្ម និងនាយកដ្ឋានធារាសាស្ត្រកសិកម្ម នៃក្រសួងធនធានទឹក និងឧតុនិយម បានចុះជួសជុលទំនប់សណ្តរស្ទឹងព្រែកត្នោត ដើម្បីខ្ទប់ទឹកទុកប្រើប្រាស់ ក្នុងរដូវប្រាំងខាងមុខ និងជួសជុលតួទំនប់ស្ទឹងព្រែកត្នោត មកដល់ពេលនេះ បានសម្រេចរួចរាល់ហើយ។
ក្រសួងធនធានទឹក និងឧតុនិយម បានលើកឡើងថា ចាប់ពីសង្កាត់គងនយ រហូតដល់សង្កាត់ស្ពានថ្ម (ផ្លូវព្រែកជ្រៃ) ខណ្ឌដង្កោ រាជធានីភ្នំពេញ មានប្រវែង ៧ ៨០០ ម៉ែត្រ និងចាប់ពីផ្លូវជាតិលេខ២ រហូតដល់សំណង់ទ្វារទឹកប្រឡាយមេព្រែកអាទាំង ប្រវែង ១ ០៥០ម៉ែត្រ ស្ថិតនៅក្នុងសង្កាត់ព្រែកកំពិស ខណ្ឌដង្កោ រាជធានីភ្នំពេញ ដែលរងការខូចខាត ដោយជំនន់ទឹកភ្លៀងស្ទឹងព្រែកត្នោត កន្លងមក។
ក្រសួង បញ្ជាក់ថា មកដល់ពេលនេះ ការងារខ្ទប់ទឹកទុកប្រើប្រាស់ ក្នុងរដូវប្រាំងខាងមុខ និងជួសជុលតួទំនប់ សម្រួលក្នុងការធ្វើចរាចរណ៍ ជូនបងប្អូនប្រជាពលរដ្ឋ នៅក្នុងតំបន់នោះ បានជួសជុលរួចរាល់ហើយ ដូចនេះ បងប្អូនប្រជាពលរដ្ឋ ដែលរស់នៅក្នុងតំបន់នោះ អាចធ្វើដំណើរឡើងវិញបាន»៕
