(ប៉េកាំង)៖ អនុរដ្ឋមន្រ្តីការបរទេសចិនលោក លឺ យូឆេង (Le Yucheng) បានថ្លែងកាលពីថ្ងៃព្រហស្បតិ៍ថា ប្រទេសចិនសង្ឃឹមថារដ្ឋាភិបាល​អាណត្តិថ្មី​របស់​សហរដ្ឋអាមេរិក ​អាច​ដើរស្របតាម​ទិសដៅ​​ជាមួយភាគីចិន​ អាចផ្តោត​សំខាន់​លើកិច្ចសហប្រតិបត្តិការ​ និង​គ្រប់គ្រង​ការខ្វែងគំនិត​ ដើម្បីជំរុញ​ទំនាក់ទំនង​រវាងប្រទេស​ទាំងពីរ​អភិវឌ្ឍន៍​ទៅមុខ។ នេះបើយោងតាមការចេញផ្សាយដោយ CGTN នៅថ្ងៃព្រហស្បតិ៍ ទី០៥ ខែវិច្ឆិកា ឆ្នាំ២០២០។

លោក លឺ យូឆេង បានថ្លែងបែបនេះនៅក្នុងសន្និសីទសារព័ត៌មានមួយ ស្តីពីកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO)។ នៅពេលដែលសាកសួរពីការបោះឆ្នោតនៅសហរដ្ឋអាមេរិក លោក លឺ យូឆេង បាននិយាយថា ​​ការបោះឆ្នោត​លើកនេះ​អាចដំណើរការ​ដោយនឹងនរ​និងរលូន។​

លោកបានមានប្រសាសន៍ថា «យើងសង្ឃឹមថាភាគីសហរដ្ឋអាមេរិក នឹងធ្វើការជាមួយប្រទេសចិនដោយឈរលើគោលការណ៍មិនមានជម្លោះ ការមិនប្រឈមមុខគ្នា ការគោរពគ្នាទៅវិញទៅមក និងកិច្ចសហប្រតិបត្តិការឈ្នះឈ្នះ»។

ទោះបីជានៅមានការខ្វែងគំនិតគ្នាក៏ដោយ ប្រទេសទាំងពីរមានផលប្រយោជន៍រួម និងឱកាសសម្រាប់ធ្វើកិច្ចសហប្រតិបត្តិការនេះ ហើយទំនាក់ទំនងទ្វេភាគីដែលប្រកបដោយស្ថិរភាព មិនត្រឹមតែផ្តល់ផលប្រយោជន៍ដល់ប្រជាជន នៃប្រទេសទាំងពីរប៉ុណ្ណោះទេ តែថែមទាំងសក្តិសមនឹងការរំពឹងទុក ពីសំណាក់សហគមន៍អន្តរជាតិទៀតផង៕