(បាងកក)៖ ក្រុមបាតុកររាប់ពាន់នាក់ បានប្រមូលផ្តុំគ្នា នៅក្រុងបាងងកកបង្ហាញពីការតក់ស្លុតនិងកំហឹង ការប្រឆាំងរបស់ពួកគេ ក្រោយរដ្ឋាភិបាលថៃបានប្រកាសពីវិធានការណ៍បន្ទាន់ដើម្បីហាមឃាត់ការប្រមូលផ្តុំមនុស្ស ៥ នាក់ឬច្រើនជាងនេះដើម្បីព្យាយាមបញ្ចប់ការតវ៉ារយៈពេល ៣ ខែ។ នេះបើតាមការចេញផ្សាយ ដោយសារព័ត៌មាន CNA នាព្រឹកថ្ងៃសុក្រ ទី១៦ ខែតុលា ឆ្នាំ២០២០។

បាតុករថៃប្រមាណ ១ ម៉ឺននាក់បានប្រមូលផ្តុំគ្នានៅថ្ងៃព្រហស្បតិ៍ ដោយស្រែកថា «ប្រាយុទ្ធចេញ» និង «ដោះលែងមិត្តភក្តិរបស់យើង»ស្របពេលក្រុមបាតុករប្រឈមមុខជាមួយប៉ូលីសនៅតំបន់ Ratchaprasong ដែលជាកន្លែងប្រសព្វដ៏មមាញឹកនៅកណ្តាលទីក្រុងបាងកក។

សកម្មជនម្នាក់បានស្រែកថា «អ្នករុញពួកយើងខ្ទប់នឹងជញ្ជាំងដូចជាសត្វឆ្កែ យើងនឹងខាំតបវិញ ដោយមិនខ្លាចបាត់បង់អ្វីទាំងអស់»។

ការធ្វើបាតុកម្មបានធ្វើតាំងពីពាក់កណ្តាលខែកក្កដា ដែលជាបាតុកម្មដ៏ធំបំផុតដើម្បីបណ្តេញលោកនាយករដ្ឋមន្រ្តីប្រាយុទ្ធ ចាន់អូចាឱ្យចេញពីតំណែង និងដើម្បីទប់ស្កាត់អំណាចរបស់ព្រះមហាក្សត្រ Maha Vajiralongkorn ។ ដោយបាតុករក៏បានប្រកាសថាពួកគេនឹងត្រឡប់មកតវ៉ាជាថ្មីនៅល្ងាចថ្ងៃសុក្រនេះ៕