(ភ្នំពេញ)៖ បច្ចុប្បន្ននេះជនមានពិការភាព ត្រូវបានយកចិត្តទុកដាក់ពីគ្រប់មជ្ឈដ្ឋាន ដោយក្នុងឆ្នាំ២០១៩កន្លងទៅនេះ ជនមានពិការភាពចូលបម្រើការងារក្នុងក្រសួង ស្ថាប័នរដ្ឋចំនួន៤០ ហើយមានជនមានពិការភាពចំនួន២៨៦០នាក់។ ក្នុងនោះស្ដ្រីពិការមានចំនួន៧៨៩នាក់ ហើយជនពិការកម្រិតធ្ងន់ចំនួន ១៥៥៧នាក់ បើគិតជាភាគចំនួន១,៩៥ភាគរយ។ នេះបើយោងតាមខ្លឹមសារ នៃសារលិខិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានកិត្តិយសក្រុមប្រឹក្សាសកម្មភាពជនពិការ ក្នុងឱកាសទិវាជនមានពិការភាពកម្ពុជាលើកទី២២ និងទិវាជនមានពិការភាពអន្តរជាតិលើកទី៣៨ ថ្ងៃទី៣ ខែធ្នូ ឆ្នាំ២០២០។
ក្នុងសារលិខិតរបស់សម្ដេចតេជោនាយករដ្ឋមន្ត្រីដដែល បានឲ្យដឹងដែរ ថា នៅក្នុងវិស័យឯកជនដែលរួមមាន៖ ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ រោងចក្រ ស្ថិតិដែលក្រសួងសង្គមកិច្ច បានធ្វើការសាលល្បងនៅរាជធានីភ្នំពេញ ខេត្តកណ្ដាល និងខេត្តសៀមរាប លើ១០២អង្គភាព មានជនមានពិការភាពចូលបម្រើការងារចំនួន៣៧៩២នាក់។ ក្នុងស្រ្ដី២១៦២នាក់ សរុបទាំងស្ថាប័នរដ្ឋ និងឯកជនទូទាំងប្រទេស មានចំនួនជនមានពិការភាពចំនួន៦៦៥២នាក់៕
